Оғир атлетика. Катта стартлар олдида муҳим босқич: терма жамоамиз Россияга йўл олди
Чирчиқ шаҳрида ўтказилган машғулотларнинг дастлабки босқичини муваффақиятли якунлаган Ўзбекистон эркаклар терма жамоаси аъзолари навбатдаги халқаро ўқув-йиғин машғулотларида иштирок этиш учун Россия Федерациясининг Сочи шаҳрига жўнаб кетишди.
Терма жамоамиз 21-февралга қадар Сочида бўлиб, ушбу йиғин давомида жисмоний, техник ва тактик тайёргарликни янада кучайтиришга алоҳида эътибор қаратади. Халқаро даражадаги мазкур машғулотлар Осиё чемпионати, Жаҳон чемпионати ҳамда Осиё ўйинлари каби нуфузли мусобақалар олдида муҳим тайёргарлик босқичи вазифасини ўтайди.
Мазкур ўқув-йиғин машғулотларига терма жамоанинг 15 нафар етакчи полвони жалб этилган. Йиғин давомида жамоага мураббийлар — Баҳром Мендибоев ва Журабек Заиров раҳбарлик қилмоқда. Спортчиларнинг соғлиги ва жисмоний ҳолати эса жамоа шифокори Абиддин Муслимов томонидан доимий назоратда бўлади.
