Нурсултон Рўзибоевнинг навбатдаги рақиби ва жанг санаси маълум бўлди
UFC расман ўзбекистонлик аралаш жанг санъати устаси Нурсултон Рўзибоевнинг навбатдаги жанги қачон ва кимга қарши бўлишини маълум қилди. Ҳужумкор услуби билан танилган Рўзибоев 17 август куни АҚШнинг Чикаго шаҳрида ўтадиган UFC 319 турнири доирасида октагонга кўтарилади. Унинг рақиби — америкалик жангчи, The Ultimate Fighter 29 шоусининг ғолиби Брайан Баттл бўлади.
Маълумот ўрнида, Андижонда туғилган Рўзибоев профессионал фаолияти давомида 47 та жанг ўтказган. У 36 та ғалаба қозонган, 9 марта мағлуб бўлган ва 2 жанг дуранг билан якунланган. Брайан Баттл эса 12 та ғалаба ва 2 мағлубиятга эга. У сўнгги тўртта жангининг барчасида зафар қучган.
Турнирнинг марказий жанги ўрта вазн чемпиони Дрикюс Дю Плесси ҳамда даъвогар Хамзат Чимаев ўртасида кечиши кутилмоқда.
