Нурсултон Рўзибоев UFC’даги жангини ўзи эълон қилди
Ўзбекистонлик аралаш жанг санъати устаси Нурсултон Рўзибоев навбатдаги жангини расман анонс қилди. 31 ёшли жангчи 17 август куни АҚШнинг Иллинойс штати, Чикаго шаҳрида бўлиб ўтадиган UFC 319 турнирида октагонга кўтарилади. Унинг рақиби сифатида америкалик Брайан Баттл билан тўқнаш келиши маълум бўлди.
Қизиғи шундаки, жанг аввал кутилган ярим ўрта вазн тоифасида эмас, балки Рўзибоев сўнгги пайтларда ҳаракат қилаётган ўрта вазнда ташкил этилади.
Нурсултон жанг ҳақида «Кўришгунча, Чикаго. UFC 319», деб изоҳ қолдирган.
Маълумот учун, Андижонда туғилган Рўзибоев фаолияти давомида 47 марта жанг қилган — 36 ғалаба, 9 мағлубият ва 2 дурангка эришган. Унинг рақиби Брайан Баттл эса 12 ғалаба ва 2 мағлубиятга эга бўлиб, сўнгги тўртта жангнинг барчасида ғалаба қозонган. Баттл The Ultimate Fighter 29 реалити-шоусининг ғолиби ҳисобланади.
UFC 319 турнирининг марказий жангидан эса ўрта вазн чемпиони Дрикюс Дю Плесси ва асосий даъвогар Хамзат Чимаев ўрин олади.
