Нодирбек Якуббоев – Rubinstein Memorial 2025 чемпиони
Полшанинг Поляница-Здруй шаҳрида ўтказилган анъанавий “Akiba Rubinstein International Chess Festival” ўз якунига етди. 61-маротаба ташкил этилган мусобақа 7 та гуруҳда ўтди. Энг нуфузли “ALREH” гуруҳида эса ҳамюртимиз, халқаро гроссмейстер Нодирбек Якуббоев бош соврин соҳибига айланди. Бу гуруҳда Ҳиндистон, Украина, Англия, Германия, Чехия ва Полша шахматчилари билан бирга жами 10 гроссмейстер иштирок этди. Ғолиб 9 тур натижаларига кўра аниқланди.
Якуббоев сўнгги турда украиналик Игор Коваленко билан дуранг ўйнади ва 6,5 очко билан пешқадамликни сақлаб қолди. Бир тур аввал у ўзининг асосий рақиби, германиялик Маттиас Блуебаум билан ҳам дурангга рози бўлганди.
Шу тариқа, Нодирбек Якуббоев Rubinstein Memorial 2025 чемпионига айланди. Мусобақа натижасида у ўз ҳисобига +18,2 рейтинг очкосини қўшди ва жонли рейтингда 45-ўринга кўтарилди.
