Нодирбек Абдусатторов киберспорт бўйича Жаҳон кубогига йўлланма олди
Chess.com платформасида классик шахматнинг онлайн турида ўтказилаётган Champions Chess Tour халқаро мусобақасига старт берилди. Турнирда юртимиз шарафини ҳимоя қилаётган гроссмейстер Нодирбек Абдусатторов муваффақиятли иштирок этмоқда.
Биринчи кун якунига кўра, Абдусатторов саралаш босқичидаги икки баҳсда зафар қучиб, ярим финалга йўл олди. У 1/8 финалда беларуслик Денис Лазавикни 3:1, 1/4 финалда эса хитойлик Вэй Ини 2,5:1,5 ҳисобида мағлуб этди.
Абдусатторовга ярим финалдаги рақиб сифатида кибершахматнинг жонли афсонаси — Магнус Карлсен тўғри келди. Норвегиялик гроссмейстер бу босқичгача Ян-Кшиштофф Дуда ва Максим Ваше-Лагравни мағлуб этган.
Асосий янгилик. Нодирбек Абдусатторов кечаги муваффақиятлари орқали 8 июл – 24 август кунлари Саудия Арабистонининг Ар-Риёд шаҳрида бўлиб ўтадиган Киберспорт бўйича Жаҳон кубогига йўлланма қўлга киритди. У билан бирга Фабиано Каруана, Вэй И, Алиреза Фирузжа ва Владислав Артемьев ҳам Жаҳон кубогида иштирок этиш ҳуқуқини қўлга киритишди.