Наманган дзюдо бўйича яна бир нуфузли мусобақага мезбонлик қилмоқда
Янги Наманган туманида жойлашган “Паҳлавон” спорт мажмуасида дзюдо спорти бўйича кичик ўсмирлар ўртасида Ўзбекистон чемпионати старт олди.
Мамлакатимизнинг турли ҳудудларидан ташриф буюрган иқтидорли ва истиқболли ёш дзюдочилар мазкур нуфузли мусобақада ўз маҳоратларини намойиш этиб, Ўзбекистон чемпионлиги учун татамига чиқмоқдалар.
Мусобақа давомида ёш спортчилар ўзларининг техник ва тактик тайёргарлиги, жисмоний имкониятлари ҳамда қатъиятини намойиш этиб, ғолиблик ва совринли ўринлар учун муросасиз баҳс олиб борадилар.
Ушбу чемпионат ёш дзюдочилар учун ўз истеъдодини намоён этиш, тажриба орттириш ҳамда келгусида Ўзбекистон терма жамоаси сафидан муносиб ўрин эгаллаш йўлидаги муҳим босқичлардан биридир.
Мусобақанинг Наманган вилоятида ўтказилаётгани эса ҳудудда спорт, хусусан, яккакураш турларини ривожлантириш, ёшлар ўртасида соғлом рақобат муҳитини шакллантириш ва иқтидорли спортчиларни қўллаб-қувватлашга қаратилаётган эътиборнинг яна бир ифодасидир.
