“Маунтин байк” бўйича Осиё чемпионатининг расмий очилиш маросими бўлиб ўтди
“Green Hills Resort” дам олиш масканида ўтган тадбирда Ўзбекистон Республикаси Олий Мажлиси Сенати ҳамда Ўзбекистон велосипед спорти федерацияси раиси Танзила Нарбоева, Осиё велоспорт Конфедерацияси президенти Дато’ Амаржит Сингх, Спорт вазири ўринбосари Шахрилло Махмудов ҳамда қатор расмийлар иштирок этишди.
Маросим маданий чиқиш билан бошланиб, терма жамоаларнинг паради билан давом этди. Шундан сўнг, сўзга чиққан Танзила Камаловна илк бор ўтказилаётган MTB бўйича Осиё чемпионатида барча иштирокчиларга омад тилади. Шунингдек, Давлатимиз раҳбари томонидан барча спорт турлари қатори велоспортга ҳам катта эътибор қаратилаётгани алоҳида қайд этилди. Ўзбекистон велоспорт федерацияси раиси сўз якунида “Маунтин байк” бўйича ўтказилаётган 33-Осиё чемпионатини расман очиқ деб эълон қилди.
Тадбир давомида иштирокчи терма жамоа вакилларига эсдалик совғалари ҳам топширилди.
Маълумот учун, Осиё чемпионатида 18 та давлатдан ташриф буюрган 300 га яқин спортчилар иштирок этмоқда. Турнир давомида : XCO (Кросс-кантри Олимпик), XCC (Кросс-кантри Қисқа трек), XCR (Кросс-кантри Жамоавий эстафета), XCE (Кросс-кантри Элиминатор), DHI (Довнхилл) йўналишлари бўйича беллашувлар бўлиб ўтади.
Эътиборлиси, Марказий Осиёда илк бор ўтказилаётган ушбу нуфузли мусобақа 2028 йилда Лос-Анжелесда бўлиб ўтадиган ёзги Олимпия ўйинлари учун муҳим рейтинг очколарини тақдим этади. Шу билан бирга, мусобақанинг айнан Бўстонлиқ туманидаги “Green Hills Resort” дам олиш масканида ташкил этилаётгани Тошкент вилоятининг туристик салоҳиятини кенг намоён этиш, спорт туризмни ривожлантириш ҳамда Бўстонлиқнинг бетакрор тоғлари, сўлим табиати ва мусаффо ҳавосини хорижий меҳмонларга яқиндан таништиришга хизмат қилади.
Қувонарлиси, Осиё чемпионатида бир йўла уч нафар ҳамюртимиз шоҳсупадан жой олди.
DHI (Довнхилл) бўйича ўтказилган муросасиз беллашувларда қизларимиз медалларни ҳеч кимга беришмади:
1-ўрин. Мария Закирова
2-ўрин. Ализа Реҷепова
3-ўрин. Севинчой Зарипбоева
