Макгрегор: «Макс билан биринчи жангда уни енгганман, энди буни яна такрорлайман»
UFCнинг икки вазн тоифасидаги собиқ чемпиони Конор Макгрегор Макс Холлоуэйга қарши бўлиб ўтадиган навбатдаги жанг олдидан ўз фикрларини билдирди.
Ирландиялик жангчи бу баҳсга тўлиқ тайёр эканини таъкидлаб, жароҳатдан кейинги тикланиш жараёни муваффақиятли якунланганини айтди. Макгрегорнинг сўзларига кўра, у октагонга қайтганидан сўнг мухлислар аввал кузатилмаган даражадаги чиқишга гувоҳ бўлишади.
Макгрегор Холлоуэй билан илк жангини ҳам эслаб ўтди. У 2013 йилда ўтган ўша баҳсда рақибини мағлуб этганини қайд этиб, реваншда ҳам худди шундай натижа қайд этилишига ишонч билдирди.
«Мен тўлиқ тикландим. Бундай жароҳатдан кейин нима қилмоқчи эканимни бу спортда ҳали кўришмаган. Макс билан биринчи жангда уни енгганман, энди буни яна такрорлайман», — дея таъкидлади Макгрегор.
Эслатиб ўтамиз, Конор Макгрегор ва Макс Холлоуэй ўртасидаги жанг UFC 329 турнирининг асосий воқеаси сифатида ўтказилади. Мазкур тўқнашув Лас-Вегасда бўлиб ўтиши режалаштирилган.
Бу жанг ҳар икки спортчи учун ҳам катта аҳамиятга эга. Макгрегор узоқ танаффусдан кейин яна юқори савиядаги жангчи эканини исботлашга уринади. Холлоуэй эса 13 йил аввалги мағлубият учун реванш олиш имкониятига эга бўлади.
