Махачев Сонненга жавоб қайтарди: Дунё шон-шуҳратига олиб борадиган йўл – бу шоу эмас
UFC рейтингларида вазн тоифасига қарамасдан биринчи ўринда турган Ислам Махачев собиқ жангчи ва таҳлилчи Чейл Сонненнинг унга нисбатан айтган «қўрқоқлик» ҳақидаги танқидларига жавоб берди.
Эслатиб ўтамиз, Соннен аввалроқ россиялик спортчини Илия Топурияга қарши жангдан бош тортгани ва пул учун ярим ўрта вазнга ўтгани учун танқид қилган, Махачевни «чақириқлар эмас, пул қизиқтиради», деб айблаган эди.
Махачев эса ижтимоий тармоқда қуйидагича муносабат билдирди:
«Шов-шув ва пул ортидан қувиш – бу спортда буюклик сари интилиш эмас. Аммо арзон гап-сўзлар билан юқорига чиққан ўртача даражадаги спортчи буни тушунмайди. Шунинг учун, илтимос, ўтир ва бу ишни қандай қилиш кераклигини бошқалардан ўрган, амаки Чейл», – деб ёзди Ислам. У пост сўнгида «икки карра чемпион» хештегини ҳам қўшди.