Магомед Курбанов рингга қайтмоқда: жанг 5 июл куни Екатеринбургда бўлиб ўтади
Россиялик профессионал боксчи Магомед Курбанов (26 ғалаба, 1 мағлубият) биринчи ўрта вазн (69,9 кг гача) тоифасида рингга қайтишини расман эълон қилди. Унинг навбатдаги жанги 2025 йил 5 июл куни Екатеринбург шаҳрида ташкил этилади. Турнирни боксчининг доимий ҳамкори — RCC Promotions компанияси ўтказади.
Ҳозирча рақиб номи ошкор этилмаган, бироқ Курбанов атрофидаги манбаларга кўра, у жаҳон даражасидаги рақиб бўлиб, россиялик спортчига халқаро саҳнада яна ўзини кўрсатиш имконини беради. Бу жанг Курбанов учун ўтган йилнинг март ойидаги оғир мағлубиятдан сўнг илк чиқиш бўлади.
Эслатиб ўтамиз, унинг ягона мағлубияти 2024 йил март ойида WBA версияси бўйича жаҳон чемпиони камари учун бўлган жангда қайд этилган. Ўшанда у ўзбекистонлик юлдуз Исроил Мадримовга қарши жанг қилиб, бешинчи раундда техник нокаут билан ютқазган эди. Бу натижа кўплаб бокс мухлислари учун кутилмаган ҳол бўлган.
