Льюис Ҳэмилтон Формула-1 тарихида кетма-кет 20 мавсум давомида пойгада етакчилик қилган илк пойгачи бўлди
Формула-1 бўйича етти карра жаҳон чемпиони, 41 ёшли британиялик пойгачи Льюис Ҳэмилтон 2026 йилги мавсумнинг дебют босқичи ҳисобланган Австралия Гран-присида мисли кўрилмаган натижани расмийлаштирди.
«Феррари» жамоаси шарафини ҳимоя қилаётган Ҳэмилтон «Қироллик пойгалари» тарихида кетма-кет 20 мавсум давомида Гран-приларда пешқадамлик қилишга муваффақ бўлган илк учувчига айланди.
Мавсумнинг илк старти якунларига кўра, британиялик тажрибали пойгачи маррага тўртинчи бўлиб етиб келди. У учинчи ўринни эгаллаган жамоадоши Шарль Леклерга имкониятни бой берди.
Австралия Гран-присининг ғолиби Ҳэмилтоннинг ватандоши ва унинг «Мерседес»даги собиқ жамоадоши Жорж Расселл бўлди. Иккинчи поғонани эса немис жамоасининг италиялик ёш учувчиси Андреа Кими Антонелли эгаллади.
