Кураш. Зиёвиддин Хўжиниёзов Австралия Кураш федерациясига табрик йўллади
Зиёвиддин Хўжиниёзов Австралия Кураш федерациясига табрик йўллади
Халқаро Кураш ассоциацияси томонидан сўнгги ойлар давомида олиб борилган самарали мулоқот ва музокаралар натижасида Австралияда Кураш федерацияси расман фаолият бошлади.
Куни кеча федерация давлат рўйхатидан муваффақиятли ўтказилди. Айни пайтда унинг расмий веб-сайтини ишга тушириш бўйича ҳам тайёргарлик ишлари якунланиш арафасида.
Халқаро Кураш ассоциацияси Президенти вазифасини бажарувчи Зиёвиддин Хўжиниёзов томонидан Федерация раҳбари Др. Сиамак Аболҳассан номига расмий табрик мактуби йўлланди.
Табрик мактубида Австралия Кураш федерациясининг Халқаро Кураш оиласига кириб келиши муносабати билан табриклар йўлланган. Федерация фаолиятига улкан муваффақиятлар тилаб қолинган.
Шунингдек, мамлакатда Кураш ҳаракатини ривожлантириш, миллий чемпионатлар ва мусобақаларни ташкил этиш, мураббийлар ҳамда ҳакамлар тайёрлаш йўналишларида Халқаро Кураш ассоциацияси томонидан ҳар томонлама амалий ва услубий кўмак кўрсатилиши таъкидланган. Федерацияни халқаро стандартларга мос сифатли кураш ёктаклари билан таъминлаш масаласи ҳам қўллаб-қувватланиши қайд этилган.
Австралияда федерация фаолиятининг йўлга қўйилиши Халқаро Кураш ассоциациясининг янги мамлакатларда Кураш географиясини кенгайтириш ва мавжуд федерациялар фаолиятини мустаҳкамлаш борасидаги изчил саъй-ҳаракатларининг яна бир амалий натижаси ҳисобланади.