Кураш. Жу-Хи Парк хоним ИКА штаб-квартирасига ташриф буюрди
Айни кунларда Ўзбекистон пойтахти Тошкент йирик халқаро спорт тадбирларига мезбонлик қилмоқда. Осиё Олимпия Кенгашининг 46-Бош ассамблеяси ҳамда Жаҳон Антидопинг агентлиги (WADA) халқаро форумида иштирок этиш мақсадида Кураш ватанига ташриф буюрган Халқаро Кураш Ассоциацияси (ИКА) Тиббиёт ва Антидопинг қўмитаси Раиси Жу-Хи Парк бугун ИКА штаб-квартирасда бўлди.
Ташриф доирасида Жу-Хи Парк Халқаро Кураш Ассоциацияси Бош котиби Муҳаммад Реза Насирий, Администрация раҳбари Мансур Мирзаев ҳамда Халқаро Кураш институти Ректори Ҳабибулла Таджиев билан учрашув ўтказди. Мулоқот чоғида тиббиёт ва антидопинг йўналишидаги ўзаро ҳамкорлик, шунингдек, яқин истиқболга мўлжалланган режалар юзасидан фикр алмашилди.
Шунингдек, меҳмон ИКА фаолияти, таълим ва илмий йўналишлар ҳамда Халқаро Кураш музейида сақланаётган экспонатлар билан яқиндан танишди.
