Кураш. ИКА қароргоҳида халқаро мусобақаларга тайёргарлик масалалари кўриб чиқилди
Бугун Халқаро Кураш Ассоциацияси (ИКА) бош қароргоҳида муҳим ишчи йиғилиш ташкил этилди. Учрашувда ИКА Бош котиби Муҳаммад Реза Насcирӣ, Ассоциация Администрацияси раҳбари Мансур Мирзаев, Ўзбекистон Кураш федерацияси раиси биринчи ўринбосари Бахтиёр Қодиров ҳамда раис ёрдамчиси Сардорбек Каримов иштирок этдилар.
Йиғилишда 2025 йилда Баҳрайн ва Саудия Арабистонида ўтказилиши режалаштирилган III Ёшлар Осиё ўйинлари ҳамда Ислом бирдамлик ўйинларида Кураш беллашувларини юқори даражада ташкил этишга оид ташкилий масалалар атрофлича муҳокама қилинди.
Муҳаммад Реза Насcирӣ Кураш ватани — Ўзбекистон ҳукумати доимий қўллаб-қувватлаши спорт турининг жаҳон миқёсидаги нуфузини янада ошираётганини таъкидлади. Шу билан бирга, халқаро мусобақалар учун сифатли яктақлар ва кураш гиламларини етказиб бериш бўйича ҳамкорликни кучайтириш масаласи юзасидан таклифлар билдирилди.
Шунингдек, учрашув давомида Кураш бўйича катталар ўртасидаги XV Жаҳон чемпионатини ташкил этиш билан боғлиқ масалалар ҳам муҳокама қилинди.
