Кураш бўйича XV Жаҳон чемпионати учун рўйхатдан ўтиш давом этмоқда
Кураш бўйича XV Жаҳон чемпионати учун рўйхатдан ўтиш давом этмоқда
Халқаро Кураш Ассоциацияси (ИКА) барча миллий федерацияларни Кураш бўйича катталар ўртасидаги XV Жаҳон чемпионатида фаол иштирок этишга чорлайди. 2026 йил 31 январ – 5 февраль кунлари бўлиб ўтадиган мазкур мусобақа йилнинг энг муҳим ва нуфузли Кураш тадбирларидан бири ҳисобланади.
Жаҳон чемпионати учун иштирокчиларни рўйхатга олиш жараёни 2025 йил 15 декабрдан 2026 йил 10 январга қадар Халқаро Кураш Ассоциациясининг расмий “IKA Registration System” орқали амалга оширилмоқда.
Рўйхатдан ўтиш жараёнида техник муаммолар юзага келган тақдирда, иштирокчилар feedback алоқа почтаси орқали мурожаат қилишлари мумкин. Барча сўровларга 24/7 режимида тезкор техник ёрдам кўрсатилиши таъминланади.
Айни пайтда Ташкилий қўмита томонидан чемпионатни халқаро талаблар даражасида, юқори савияда ўтказиш мақсадида кенг кўламли тайёргарлик ишлари олиб борилмоқда.
Чемпионат доирасида халқаро Кураш ҳакамлари ва мураббийлари учун махсус семинарлар ҳамда имтиҳонлар ташкил этилади. Мазкур дастурлар доирасида мураббийлар А ва Б тоифалари, ҳакамлар эса 2 ва 3 юлдуз даражалари бўйича имтиҳонларда иштирок этиш имкониятига эга бўладилар.
Вақт жуда кам қолди. Кураш тарихида муҳим ўрин эгаллайдиган ушбу нуфузли мусобақанинг бир қисмига айланиш имкониятини қўлдан бой берманг.
XV Жаҳон чемпионати — бу нафақат мусобақа, балки Курашнинг жаҳон миқёсидаги буюк байрамидир.
