Конор Макгрегор ва Макс Холлоуэй жанги чипталари 4 дақиқада сотилиб кетди
Икки вазн тоифасида собиқ UFC чемпиони, ирландиялик Конор Макгрегор ҳамда америкалик Макс Холлоуэй ўртасидаги жанг учун чиқарилган чипталар бор-йўғи 240 сония ичида тўлиқ сотиб бўлинди. Бу ҳақда таниқли AS нашри хабар бермоқда. Мазкур кўрсаткич UFC тарихидаги мутлақ рекорд натижа сифатида қайд этилди.
Манбанинг берган маълумотларига кўра, «T-Mobile Arena»нинг биринчи қаторида жой олган энг қиммат чипталар нархи 43 минг доллардан ошган. Юқори минбарлардаги энг арзон чипталар эса қарийб 600 долларни ташкил этган. Ҳозирда қайта сотув бозорида энг арзон чипталар баҳоси 1500 доллардан бошланмоқда.
Ушбу узоқ кутилган қарама-қаршилик жорий йилнинг 12 июль куни АҚШнинг Лас-Вегас шаҳрида (Невада штати) бўлиб ўтадиган «UFC 329» турнирининг марказий жанги бўлади.
Эътиборли жиҳати, Макгрегор учун мазкур жанг деярли тўрт йиллик танаффусдан кейинги илк расмий чиқиш бўлади. Ирландиялик жанчи сўнгги бор 2021 йил июль ойида ўтказилган «UFC 264» турнирида октагонга кўтарилган эди. Ўшанда у дастлабки раунддаёқ оёғидан оғир жароҳат олиб, Дастин Порега техник нокаут эвазига имкониятни бой берган эди.
Маълумот ўрнида, Конор Макгрегор профессионал аралаш яккакурашлардаги фаолиятини 2008 йилда бошлаган бўлиб, 2013 йилдан буён UFC шафелигида жанг қилиб келади. У фаолияти давомида ярим енгил (65 кг гача) ва енгил (70 кг гача) вазн тоифаларида UFC чемпионлик камарларини қўлга киритган.
