Конор Макгрегор навбатдаги жангини собиқ UFC чемпионига қарши ўтказади — манба
Таниқли канадалик журналист ва инсайдер Ариел Хелвани ўз кўрсатувида хабар беришича, UFC'нинг икки вазн тоифасидаги собиқ чемпиони, 37 ёшли ирландиялик Конор Макгрегор навбатдаги жангини 66 кг вазн тоифасидаги собиқ чемпион, америкалик Макс Холлоуейга қарши ўтказади.
Мавжуд маълумотларга кўра, айнан Макс Конорнинг бўлажак жанги учун энг эҳтимолий номзод бўлиб турибди. Шу билан бирга, Хорхе Масвидал Макгрегор учун потенциал рақиблар рўйхатида йўқ. Ирландиялик спортчининг қайтиши 11 июль куни Лас-Вегасда бўлиб ўтадиган UFC 330 турнирига режалаштирилмоқда.
Эслатиб ўтамиз, Конор Макгрегор 2021 йилнинг июлидан буён MMAdagi чиқишларини тўхтатиб қўйган эди. Ўшанда у UFC 264 турнирида америкалик Дастин Порьега қарши баҳснинг биринчи раундида оёғидан олган жароҳати сабабли техник нокаут билан мағлуб бўлган эди. Унинг профессионал рекорди 22 ғалаба ва 6 мағлубиятни ташкил этади.
