Конор Макгрегор 2026 йилда UFCнинг энг кўп текширилган жангчисига айланди
Икки вазн тоифасида UFC собиқ чемпиони, 37 ёшли ирландиялик спортчи Конор Макгрегор 2026 йил бошидан буён Шимолий Америка ташкилотининг энг кўп допинг-тест топширган жангчиси бўлиб турибди. Бу ҳақда UFC жангчиларидан олинган допинг-тестлар бўйича расмий сайт маълумот тарқатди.
Эълон қилинган статистикага кўра, 2026 йилнинг ўтган даври мобайнида жами 597 нафар жангчи допинг-назорaтидан ўтказилган бўлиб, жами 771 та намуна йиғилган. Жорий йилда 54 нафар спортчи икки марта допинг-тест топширган бўлса, фақатгина Конор Макгрегор йил бошидан буён уч бор ушбу жараёндан ўтган ягона жангчи бўлиб турибди.
Эслатиб ўтамиз, ирландиялик спортчи 2021 йилнинг июль ойидан буён аралаш яккакураш қоидалари бўйича жангларда иштирок этмаяпти. У сўнгги бор UFC 264 турнирида енгил вазн тоифасидаги собиқ вақтинча чемпион, америкалик Дастин Порьега қарши октагонга кўтарилган эди.
Ўшанда Макгрегор биринчи раундда оёғидан олган жароҳати туфайли техник нокаут билан мағлубиятга учраган. Ҳозирги вақтда Конор Макгрегорнинг профессионал рекорди 22 ғалаба ва 6 мағлубиятни ташкил этмоқда.
