Ислом бирдамлик ўйинларида оғир атлетика якунлари: Ўзбекистон Осиёда энг юқори натижа қайд этди!
VI Ислом бирдамлик ўйинлари ўз якуннига етди ва унда оғир атлетика бўйича Осиё делегацияси юқори натижаларни қайд этди. Мусобақа давомида қитъа спортчилари жами 81 та медални қўлга киритиб, 89 нафар атлетдан иборат энг катта делегация сифатида иштирок этди.
Мусобақа якунланганидан сўнг Осиё оғир атлетика федерацияси расмий статистикани эълон қилди ва унда Ўзбекистон терма жамоасининг юқори натижаларини алоҳида таъкидлади. Спортчиларимиз 6 та олтин, 9 та кумуш, 5 та бронза жами 20 та медаль билан Осиё давлатлари орасида пешқадамликни қўлга киритиб, мусобақанинг энг муваффақиятли делегациясига айланди. Бу натижа Ўзбекистон оғир атлетикасининг барқарор ривожланиб бораётганини ҳамда спортчиларимизнинг профессионал маҳоратини яна бир бор тасдиқлади.
Шунингдек, Баҳрайн, Индонезия, Қозоғистон ва Эрон делегациялари ҳам муносиб натижаларни намойиш этди. Мазкур мусобақадаги иштирок Осиё қитъасининг оғир атлетика спорти тараққиётига сезиларли ҳисса қўшишда давом этаётганини яна бир бор тасдиқлади.
