Islom birdamlik o‘yinlarida og‘ir atletika yakunlari: O‘zbekiston Osiyoda eng yuqori natija qayd etdi!
VI Islom birdamlik o‘yinlari o‘z yakuniga yetdi va unda og‘ir atletika bo‘yicha Osiyo delegatsiyasi yuqori natijalarni qayd etdi. Musobaqa davomida qit’a sportchilari jami 81 ta medalni qo‘lga kiritib, 89 nafar atletdan iborat eng katta delegatsiya sifatida ishtirok etdi.
Musobaqa yakunlanganidan so‘ng Osiyo og‘ir atletika federatsiyasi rasmiy statistikani e’lon qildi va unda O‘zbekiston terma jamoasining yuqori natijalarini alohida ta’kidladi. Sportchilarimiz 6 ta oltin, 9 ta kumush, 5 ta bronza jami 20 ta medal bilan Osiyo davlatlari orasida peshqadamlikni qo‘lga kiritib, musobaqaning eng muvaffaqiyatli delegatsiyasiga aylandi. Bu natija O‘zbekiston og‘ir atletikasining barqaror rivojlanib borayotganini hamda sportchilarimizning professional mahoratini yana bir bor tasdiqladi.
Shuningdek, Bahrayn, Indoneziya, Qozog‘iston va Eron delegatsiyalari ham munosib natijalarni namoyish etdi. Mazkur musobaqadagi ishtirok Osiyo qit’asining og‘ir atletika sporti taraqqiyotiga sezilarli hissa qo‘shishda davom etayotganini yana bir bor tasdiqladi.
