Икки ўзбекистонлик спортчи допинг сабаб Aichi–Nagoya-2026 Осиё ўйинларидан четлатилди
Aichi–Nagoya-2026 Осиё ўйинлари арафасида икки спортчи допинг билан боғлиқ ҳолат сабаб мусобақаларда иштирок этиш ҳуқуқидан вақтинча маҳрум қилинди. Павел Эйгел ва ўзбекистонлик Нодирбек Шавкатовдан олинган намуналарда тақиқланган моддалар аниқлангани Халқаро допинг-тест агентлиги томонидан тасдиқланди.
Манбага кўра, Павел Эйгелнинг таҳлилида триметазидин, Нодирбек Шавкатовнинг намунасида эса мельдоний моддаси топилган. Ҳар икки модда антидопинг қоидаларига кўра тақиқланган препаратлар рўйхатига киритилган.
Шундан сўнг ҳар икки спортчига нисбатан вақтинчалик четлатиш чораси қўлланилди. Шу сабабли Эйгел ва Шавкатов Aichi–Nagoya-2026 Осиё ўйинларида иштирок эта олмайди. Уларнинг ишлари белгиланган антидопинг тартиб-таомиллари асосида алоҳида кўриб чиқилади.
Маълумот учун, вақтинчалик четлатиш якуний дисквалификация ҳисобланмайди. Спортчиларга нисбатан якуний қарор қўшимча текширувлар, тушунтиришлар ва тегишли ҳуқуқий жараёнлар якунланганидан сўнг эълон қилинади.
