Хотамбек Бойназаров 24 июл куни октагонга қайтади
Ярим ўрта вазн тоифасида UAE Warriors лигаси чемпиони бўлган ўзбекистонлик ММА жангчи Хотамбек Бойназаровнинг навбатдаги жанги санаси ва жойи маълум бўлди. Унинг мураббийи билдиришича, Бойназаров 24 июл куни Абу-Дабидаги Space42 Arena мажмуасида бўлиб ўтадиган UAE Warriors 62 турнирида иштирок этади.
Ҳозирча рақиби расман эълон қилинмади. Шу билан бирга, мутахассиснинг сўзларига кўра, у куни Хотамбек UFC’нинг собиқ жангчиларидан бирига қарши рингга чиқади.
Эслатиб ўтамиз, Бойназаров ҳозиргача профессионал ММАда 10 та жанг ўтказган ва барчасида ғалаба қозонган. У сўнгги марта ўтган йилнинг октябрида октагонга чиқиб, озарбайжонлик Тагир Абдуллаевни очколар ҳисобида мағлуб этган эди. Шу натижа орқали у UAE Warriors чемпиони унвонини қўлга киритган.
