«Хоразм» янги мавсумга тайёргарликни бошлаб юборди
Ўтиш ўйини орқали мамлакат миллий чемпионати — Олий лига йўлланмасини қўлга киритган Урганчнинг “Хоразм” профессионал футзал клуби янги мавсумга биринчи бўлиб киришди.
Элита баҳсларига муносиб тайёргарлик кўриш мақсадида клуб таркибни кучайтириш борасида фаол иш олиб бормоқда. Олий лигага чиқишда муҳим ҳисса қўшган ўтган мавсумдаги асосий таркибнинг ўзаги сақлаб қолинган. Шу билан бирга, мамлакат футзалининг юқори дивизионида тажриба орттирган бир қатор маҳоратли ва иқтидорли футзалчилар ҳам айни пайтда жамоа сафида синовдан ўтмоқда.
Клуб раҳбари Миржалол Қурбановнинг таъкидлашича, ёзги трансфер ойнаси имкониятларидан унумли фойдаланиш режалаштирилган:
"Таркибимизни янада кучайтиришни мақсад қилганмиз. Йиғинда тажрибали ва салоҳиятли футзалчилар иштирок этмоқда. Мураббийлар штабида ҳам янгиланишлар кутилмоқда. Аввало жамоани тўлиқ шакллантириб, янги футболчилар билан шартномаларни расмийлаштириб оламиз. Шунингдек, барча янгиликларни мухлисларимиз билан батафсил бўлишамиз."
Клубда инфратузилма ва ташкилотчилик йўналишида ҳам муҳим ўзгаришлар амалга оширилмоқда. “Хоразм” профессионал футзал клуби масъулияти чекланган жамият сифатида давлат рўйхатидан ўтказилди. Шунингдек, клубнинг янги рамзи, логотипи ва атрибутикалари ишлаб чиқилиб, тасдиқланган ҳамда Ўзбекистон футзал федерациясига тақдим этилди.
