«Гулистон» сайқалланмоқда, «Арал» эса тур кашфиётига айланди
Мамлакат биринчилигида биринчи давра баҳслари ўз ниҳоясига етди. Ҳозирча фақат битта жамоа — “Гулистон” юз фоизлик натижа қайд этиб, ишонч билан Олий лига сари одимламоқда. Сирдарёликлар энг яқин таъқибчиларидан саккиз очко илгарилаб кетишган.
Ўз олдига катта мақсадларни қўйган Равшан Толипов бошчилигидаги гулистонликлар Тошкентда бўлиб ўтган 2-турни ҳам кўтаринки кайфиятда ўтказишди. Сирдарё вилояти жамоаси тур давомида рақиблари дарвозасига жами 27 та гол киритишди. Деярли барча учрашувларда уларнинг рақибларидан бир бош устун эканлиги яққол сезилиб турди. Агар "Гулистон" шу темпда ҳаракат қилишда давом этса, нафақат ўз олдига қўйилган вазифани шараф билан уддалайди, балки кучлилар сафига ҳам тайёр ҳолда етиб боради. Бу йўлда жамоага самарали изланишларни тилаймиз.
Тур кашфиёти сифатида эса “Арал” жамоасини эътироф этиш мумкин. Қорақалпоғистонликлар пешқадамга ҳам жиддий қаршилик кўрсатди. “Гулистон” “Арал”ни фақатгина битта тўп фарқи билан, катта қийинчилик ила мағлуб этганлиги фикримизда далилдир. Нукуслик йигитлар қолган барча учрашувларда зафар қучиб, пешқадамлар сафига яқинлашишди. Ҳатто, Олий лигани кўзлаб, юқори мақсадлар билан Лигада иштирок этаётган “Политехник” ва “ТерДУ” жамоалари ҳам Темур Искандеров шогирдларининг иштиёқи ва шижоати олдида бош эгишди.
2-турни муваффақиятли ўтказган жамоалар сафига “Хоразм”ни ҳам қўшиш мумкин. Турнинг илк куни “Политехник”ка қарши баҳсда имкониятни бой берган Фурқат Хайруллоев шогирдлари қолган ўйинларда ташаббусни қўлдан бой беришмади. Бу эса Ўзбекистоннинг илк чемпиони бўлган жамоа ҳамшахарларига кутилган ғалабаларни тақдим этди. Натижада мамлакатимизнинг энг шимолий ҳудудидан келган иккинчи жамоа ҳам карвонбошилар қаторига қўшилди.
Умуман олганда, Биринчи лига баҳслари турдан турга тобора қизиқарли ва муросасиз тарзда кечмоқда. Бу эса иккинчи даврада ҳам мухлисларга унутилмас лаҳзаларни тақдим этишига ишончни оширади.
Эслатиб ўтамиз, Биринчи лигада 1-ўринни эгаллаган жамоа келгуси мавсумда тўғридан тўғри Олий лигада иштирок этиш ҳуқуқини қўлга киритади. Иккинчи ўрин соҳиби эса Олий лигада 11-ўринни эгаллаган жамоа билан ўтиш ўйинида куч синашади.
