Грецияда Панхелленик Кураш чемпионати бўлиб ўтди
2026 йил 7–8 март кунлари Грециянинг Аминтео шаҳрида ёшлар ва ўсмирлар ўртасида Панхелленик Кураш чемпионати бўлиб ўтди. Мазкур мусобақа мамлакатнинг ушбу ёш тоифаларидаги энг кучли полвонларини аниқлаш ҳамда Греция терма жамоаси таркибини шакллантириш мақсадида ташкил этилди. Ғолиб ва совриндор спортчилар келгусида халқаро, қитъа ва жаҳон чемпионатларида мамлакат шарафини ҳимоя қилиш учун саралаб олинди.
Нуфузли мусобақада Грециянинг турли ҳудудларидан ташриф буюрган 24 та спорт клубидан жами 163 нафар спортчи гиламга чиқди. Беллашувлар юқори савияда, кескин ва муросасиз руҳда ўтди.
Эътиборга молик жиҳати шундаки, Греция кураши тарихида илк бор ушбу чемпионатда кўзи ожиз спортчилар ҳам иштирок этиб, ўзларининг матонати ва спортга бўлган қизиқишини намоён этдилар. Бу эса кураш спортининг инклюзивлик тамойилларига содиқлигини ва унинг тобора кенг оммалашиб бораётганини намунасидир.
Мусобақа якунида ташкилотчилар барча иштирокчи спортчиларга, айниқса имконияти чекланган спортчиларга Курашга бўлган фидойилиги ва фаол иштироки учун алоҳида миннатдорлик билдирдилар.
