Гандбол. «Париж бутунжаҳон ўйинлари»да ўзбекистонлик спортчилар чемпионликни қўлга киритди
«Париж бутунжаҳон ўйинлари»да гандболчи қизларимиз чемпионликни қўлга киритди. Бу ҳақда Спорт вазирлиги матбуот хизмати хабар берди.
Франциянинг Париж шаҳрида бир неча кун давом этган «Париж бутунжаҳон ўйинлари» («Paris World Games») ниҳоясига етди.
Қувонарлиси, U-18 ёш тоифасидаги қизлардан иборат Ўзбекистон миллий жамоаси 2015 йилда асос солинган мазкур нуфузли мусобақада илк бор қатнашганига қарамай, U-18 биринчилиги чемпиони деган шарафли номни қўлга киритди.
Қизларимиз ҳал қилувчи ўйинда «Dole-Choussin» HC (Франция) жамоаси устидан 29:11 ҳисобида ғалаба қозониб, ҳақли равишда шоҳсупанинг биринчи поғонасига кўтарилди.
Эслатиб ўтиш жоиз, терма жамоамиз ушбу зафарли йўлнинг гуруҳ босқичида Бразилия (32:14), «Dole-Choussin» HC (Франция, 22:8), «Volenseiennes Handball” VHB2 (Франция, 24:17), яримфиналда «Pays De Lesneven Handball» (Франция,18:9) жамоаларини ишончли тарзда мағлуб этди.
