Футзал. Ўзбекистон терма жамоаси бош мураббийи Хосе Мария Мендес Тошкентга етиб келди
Бугун футзал бўйича Ўзбекистон миллий терма жамоасининг янги бош мураббийи, испаниялик мутахассис Хосе Мария Мендес мамлакатимизга етиб келди. Уни Ислом Каримов номидаги Тошкент халқаро аэропортида Ўзбекистон футзал федерацияси масъул ходимлари кутиб олишди.
Испаниялик мураббий шу ернинг ўзида матбуот хизматимизга қисқача интервью берди:
- Ўзбекистон терма жамоаси Бош мураббийи лавозимига тайинланганимдан хурсандман. Бу мамлакат билан боғлиқ менда жуда илиқ хотиралар бор. Ўзбек футзалида катта ривожланиш кузатяпман, янги авлод футзалчилари улғайиб келмоқда. Менинг кузатишларимча, Ўзбекистонда футзал ривожланиши учун яхши шароитлар яратилмоқда. Ўзбекистон футзалини янада юқори босқичларга олиб чиқишда ўз ҳиссамни қўшиш учун имконият берилганидан хурсандман. Аввало, футзалчилар билан яқиндан танишишим, уларнинг маҳорати, қобилияти ва салоҳиятини ўрганишим лозим. Шуга мувофиқ кейин машғулотлар режасини ишлаб чиқамиз.
