Футзал. Олий лигага ўтиш турнири Жиззахда бўлиб ўтади
Ўзбекистон футзал федерацияси жорий йилнинг июн ойининг иккинчи ва учинчи ўн кунлигда олий лига йўлланмаси учун ўтиш турнирини режалаштиргани ҳақида аввал хабар берган эдик.
Мазкур мусобақада биринчи лиганинг охирги мавсуми иштирокчилари, шунингдек, янгидан шакллантирилган профессионал жамоалар ҳамда май ойи сўнгги ўн кунлигида ўтказиладиган иккинчи лига мусобақаси ғолиби қатнашади.
Регламентга мувофиқ турнир иштирокчи жамоаларнинг сонидан келиб чиққан ҳолда гуруҳларда, бир даврали тизимда ўтказилади. Гуруҳларда биринчи ва иккинчи ўринни эгаллаган жамоалар плей-оффда курашни давом эттирадилар. Бунда "A" гуруҳи ғолиби "B" гуруҳида иккинчи ўринни эгаллаган жамоага қарши, "B" гуруҳи ғолиби "A" гуруҳининг иккинчи жамоасига қарши ярим финал учрашувида майдонга чиқади. Ярим финал ғолиблари эса ҳал қилувчи учрашувда олий лиганинг ягона йўлланмаси учун баҳс олиб боришади.