ФИДЕ рейтинги янгиланди: Абдусатторов ва Якуббоев юқорилади, Синдоров 4-ўрнини сақлаб қолди
Халқаро шахмат федерацияси — ФИДЕ 2026 йил октябрь ойи учун янгиланган рейтингни эълон қилди. Янги рўйхатда Ўзбекистон вакилларидан Нодирбек Абдусатторов ва Нодирбек Якуббоев юқорилаган бўлса, Жавоҳир Синдоров дунё рейтингидаги 4-ўрини сақлаб қолди.
Нодирбек Абдусатторов рейтингига 18 очко қўшиб, кўрсаткичини 2762 дан 2780 очкога етказди. Натижада у сентябрдаги 7-ўриндан 5-поғонага кўтарилди. Жавоҳир Синдоров эса 2782 очко билан 4-ўринда қолди. Шу тариқа, дунёнинг ТОП-5 шахматчиси орасидан икки нафар ўзбекистонлик гроссмейстер жой олди.
Нодирбек Якуббоев ҳам рейтингда сезиларли кўтарилди. У бир ой давомида рейтингига 27 очко қўшиб, кўрсаткичини 2685 дан 2712 очкога етказди. Натижада Якуббоев 39-ўриндан 26-поғонага кўтарилиб, 13 та ўрин юқорилади.
Маълумот учун, ФИДЕнинг октябрь рейтингида Магнус Карлсен 2823 очко билан етакчилик қилмоқда. Хикару Накамура 2792 очко билан иккинчи, Фабиано Каруана 2784 очко билан учинчи ўринда. Кейинги икки поғонани эса Жавоҳир Синдоров ва Нодирбек Абдусатторов эгаллаб турибди.
