ЎФФ Президенти кубоги. Низом бўйича жамоалар томонидан бажарилиши лозим бўлган энг асосий талаблар бор
Турнирда футбол бўйича Суперлига, Про-лига ва Биринчи лига жамоаларида 2025-йилда, шунингдек, футзал бўйича Олий ва биринчи лига жамоаларида 2024-2025-йилги мавсумда рўйхатдан ўтказилган футболчи ва футзалчиларнинг иштирок этиши тақиқланади (2009 ва ундан кейинги йилларда туғилган ўйинчилар бундан мустасно) ;
ЎФФ рўйхатидан ўтган футзалчининг бошқа жамоа сафида майдонга тушиши тақиқланади;
Жамоалар 14 нафардан кам бўлмаган, 20 нафаргача футзалчини ва 3 нафар расмийни рўйхатдан ўтказиши мумкин. Жамоа таркибига 3 нафар 2009-йил ва ундан кейин туғилган ўйинчиларни киритиши мажбурий ҳисобланади;
Турнир иштирокчилари учрашув қайдномасига 5 нафар (шулардан бири 2009-йил ва ундан кейин туғилган ёш футзалчи майдонда ҳаракатланиши, унинг қўлида махсус боғичи бўлиши шарт) асосий ва 10 нафар (шулардан бири 2009-йил ва ундан кейин туғилган ёш футзалчи) заҳира футзалчи киритилади. Расмий шахслар орасида жамоа шифокорининг бўлиши мажбурийдир. Заҳира ўриндиғига учрашув қайдномасида бўлмаган шахслар қўйилмайди;
Жамоа бир кун давомида биттадан ортиқ ўйинда иштирок этишига йўл қўйилмайди;
Футзалчилар фақат футзал ўйинлари учун рухсат этилган спорт оёқ кийимида, оёқнинг олд қисмига ҳимояловчи (шитка) мосламада бўлиши шарт;
Жамоалар мезбон ва меҳмон кийимлари тўпламига эга бўлиши шарт. Майдондаги жамоалар кийимларининг ранги бир хил бўлган тақдирда тақвим бўйича номинал меҳмон жамоа кийимини алмаштиради. Жамоалар кийимларида рақамлари кўрсатилади.
Турнирдаги мусобақани ташкил этиш ва ўтказиш билан боғлиқ харажатлар, ҳакамлар, оператор ва учрашув расмийларининг хизмат ҳақлари ЎФФ ҳисобидан қопланади.
Мусобақада иштирок этувчи жамоаларнинг хизмат сафари билан боғлиқ харажатлар (келиши-кетиши, овқатланиши ва яшаши) сафарига юборадиган ташкилот томонидан тўланади;
