ҚФБ Ўзбекистон термаси қатнашган турнирдаги иштироксизлик борасидаги танқидларга жавоб берди
Қозоғистон бокс федерацияси ижрочи директори Рауан Игенев Польша пойтахти Варшавада ўтаётган World Boxing кубогида миллий терма жамоанинг иштирок этмагани борасида баёнот берди.
Ўзбекистон терма жамоаси мазкур мусобақага асосий таркиб билан келган бўлса, Қозоғистон унда иштирок этишдан воз кечди. Бу қарор спорт жамоатчилиги ва ижтимоий тармоқларда қизғин муҳокамаларга сабаб бўлди.
«Ҳар бир терма жамоанинг ўз тайёргарлик режаси, устувор йўналишлари ва машғулот жараёни бор» , — деди Игенев. — «Биз барча жараёнларга тизимли ёндашамиз. Кимдир мусобақада қатнашяпти, кимдир машғулотда, яна бошқалар бошқа турнирларга тайёргарлик кўряпти. Ҳеч бир боксчимиз бекор ўтиргани йўқ»
Унинг таъкидлашича, Қозоғистон термаси Польшадаги босқичда қатнашмагани ортиқча муҳокамага сабаб бўлмаслиги керак.
«Албатта, Қозоғистон ва Ўзбекистон терма жамоалари ўртасидаги тўқнашувлар ҳар доим катта қизиқиш уйғотади, шу боис бундай мавзулар муҳокама қилинаётганини тушунаман. Аммо қайси мусобақада қатнашишни танлаш — ҳар бир жамоанинг ички иши. Бугун биз иштирок этмадик, эртага, эҳтимол, Ўзбекистон бизнинг мусобақамизга келмас — спортда бундай ҳолатлар бўлиб туради. Бир турнирда қатнашмаслик жамоа рейтинги ёки нуфузига таъсир қилмайди» , — дея хулоса қилди Игенев.