Эдди Хирн: Эннис супер ярим ўрта вазнга ўтиши мумкин
Британиялик машҳур промоутер Эдди Хирн IBF ва WBA камарлари соҳиби Жейрон Энниснинг (34-0, 30 KO) фаолиятидаги кейинги қадамлар ҳақида фикр билдирди.
— Менимча, ҳозирги энг муҳим савол — Эннис ярим ўрта вазнда қоладими? Унинг Станионисга қарши жанги жуда кучли ўтди. Ҳар томонлама яхши жанг бўлди, лекин тиббий жиҳатдан унга оғир бўлди. Менимча, у супер ярим ўрта вазнда ўзини анча қулай ҳис қилади, — деди Хирн.
Унинг сўзларига кўра, Эннис аввалига ушбу вазнда камарларни бирлаштиришни мақсад қилган, аммо бу вазифа бажарилди. Эндиликда унинг қайси йўналишда ҳаракатланиши муҳим қарорга айланган.
— Энниска Теофимо Лопесга қарши жанг ғояси жуда ёқади. Бироқ бу фақат ярим ўрта вазнда амалга ошиши мумкин. Агар у вазн алмаштирса, Лопес билан жанг ҳам бекор бўлади. Шунинг учун тез орада якуний қарор қабул қилишимиз керак, — дея қўшимча қилди Хирн.
Эслатиб ўтамиз, Жейрон Энниснинг навбатдаги рақиби — ушбу вазн тоифасидаги WBAнинг мажбурий даъвогари, ўзбекистонлик Шаҳрам Ғиёсов бўлиши кутилмоқда.
