Доминикан Республикаси Панамерика Кураш чемпионатида умумжамоа ҳисобида ғолиб бўлди
Доминикан Республикасининг Санто Домини Чика шаҳрида катталар, ёшлар ва ўсмирлар ўртасидаги Панамерика Кураш чемпионати муваффақиятли якунланди. Халқаро Кураш Ассоциацияси тақвимидан ўрин олган мусобақа Панамерика Кураш Иттифоқи ҳамда Доминикан Кураш Федерацияси ҳамкорлигида ташкил этилди.
Қитъанинг ўндан ортиқ давлатлари иштирок этган чемпионатда мезбон Доминикан Республикаси терма жамоаси 16 та олтин, 10 та кумуш ва 4 та бронза медални қўлга киритиб, умумжамоа ҳисобида ишончли ғалабага эришди.
Коста-Рика 2 та олтин, 2 та кумуш ва 5 та бронза медал билан иккинчи, Колумбия эса 1 та олтин, 1 та кумуш ва 1 та бронза медал билан учинчи ўринни эгаллади. Шунингдек, Гаити, Мексика, Перу ва Венесуэла вакиллари ҳам совриндорлар сафидан жой олди.
🎙Чемпионатнинг очилиш маросимида иштирокчи давлатлар делегациялари тантанали парад билан майдонга чиқди. Мусобақани Панамерика Кураш Иттифоқи Президенти Jaime Casanova расман очиқ деб эълон қилди.
Икки гиламда ўтказилган баҳслар халқаро экспертлар Kim Eur Joong ва Ишоқ Зай Ажмал техник назорати остида ташкил этилди.
Панамерика Кураш ҳафталиги доирасида ўтказилган ушбу чемпионат Кураш спортнинг Америка қитъасида тобора оммалашиб бораётгани ҳамда халқаро ҳамкорликнинг изчил ривожланаётганини яна бир бор намоён этди.
