Дастин Порье ҳибсга олинишининг ижобий томонини айтди
UFC собиқ вақтинчалик енгил вазн чемпиони Дастин Порье июн ойида ҳибсга олинган воқеа ҳаётига жиддий таъсир қилганини тан олди. 37 ёшли америкалик жангчи ушбу ҳолат оғриқли бўлганига қарамасдан, балки айнан шу воқеа унга керак бўлганини таъкидлади.
21-июнь куни Порье маст ҳолатда жамоат жойида бўлгани сабаб самолётдан туширилган ва кейинчалик полиция томонидан қўлга олинган. Полиция ходимининг тана камерасидаги видеода жангчининг ҳуқуқ-тартибот вакили билан тортишгани, шундан сўнг унга кишан тақилгани акс этган.
Порьенинг айтишича, ушбу воқеадан кейин у алкоголга бўлган муносабатини ўзгартиришга қарор қилган. Жангчи фарзандлари уни маст ҳолатда ҳеч қачон кўрмаслигини исташини таъкидлаб, ўз оиласида давом этиб келган салбий одатга айнан ўзи нуқта қўймоқчи эканини билдирган.
Шунингдек, Порье узоқ йиллардан бери руҳий муаммолар билан курашиб келаётганини ва ҳозир ҳам терапияда ўрганган усулларидан ҳар куни фойдаланишини айтди. Унинг сўзларига кўра, бундай муаммолар бирданига йўқолиб кетмайди ва у ўз ҳолатини назорат қилиш учун мунтазам равишда ўз устида ишлашда давом этмоқда.
