Чим устида хоккей бўйича Ўзбекистон терма жамоаси — бронза совриндори ва Осиё ўйинлари йўлланмаси соҳиби
Тайланднинг Бангкок шаҳрида ўтказилган 2026-йилги Осиё ўйинлари саралаш турнири Ўзбекистон эркаклар терма жамоаси учун ёрқин натижалар билан якунланди.
Вакиларимиз мусобақа давомида юқори даражадаги ирода, интизом ва жамоавий ўйинни намойиш этиб, муддатидан аввал Айчи-Нагоя 2026 Осиё ўйинлари йўлланмасини қўлга киритди.
Гуруҳ босқичида жамоамиз:
Шри-Ланкага қарши баҳсда имкониятни бой берган бўлса, Хитой Тайпейини 8:0 ҳисобида мағлуб этиб, Бангладеш билан дуранг натижа қайд этди
Ярим финал босқичи ҳам ниҳоятда кескин ўтди — Ўзбекистон ва Уммон терма жамоалари 4:4 ҳисобида дуранг ўйнади. Пеналтилар сериясида эса омад рақиб томонда бўлиб, 5:4 ҳисобида Уммон финал йўлланмасини қўлга киритди.
3-ўрин учун баҳсда Ўзбекистон Индонезияга қарши майдонда 3:2 ҳисобида ғалаба қозониб, бронза медалларини қўлга киритди.
Шу тариқа, Ўзбекистон чим устида хоккей бўйича терма жамоаси Айчи-Нагоя 2026 Осиё ўйинлари иштирокчиси сифатида тарихий натижага эришди.
Эслатиб ўтамиз, Айчи-Нагоя 2026 Осиё ўйинлари мусобақалари жорий йилнинг 19-сентябр – 4-октябр кунлари бўлиб ўтади.
