Chim ustida xokkey bo‘yicha O‘zbekiston terma jamoasi — bronza sovrindori va Osiyo o‘yinlari yo‘llanmasi sohibi
Tailandning Bangkok shahrida o‘tkazilgan 2026-yilgi Osiyo o‘yinlari saralash turniri O‘zbekiston erkaklar terma jamoasi uchun yorqin natijalar bilan yakunlandi.
Vakillarimiz musobaqa davomida yuqori darajadagi iroda, intizom va jamoaviy o‘yinni namoyish etib, muddatidan avval Aichi-Nagoya 2026 Osiyo o‘yinlari yo‘llanmasini qo‘lga kiritdi.
Guruh bosqichida jamoamiz:
Shri-Lankaga qarshi bahsda imkoniyatni boy bergan bo‘lsa, Xitoy Taypeyini 8:0 hisobida mag‘lub etib, Bangladesh bilan durang natija qayd etdi
Yarim final bosqichi ham nihoyatda keskin o‘tdi — O‘zbekiston va Ummon terma jamoalari 4:4 hisobida durang o‘ynadi. Penaltilar seriyasida esa omad raqib tomonda bo‘lib, 5:4 hisobida Ummon final yo‘llanmasini qo‘lga kiritdi.
3-o‘rin uchun bahsda O‘zbekiston Indoneziyaga qarshi maydonda 3:2 hisobida g‘alaba qozonib, bronza medallarini qo‘lga kiritdi.
Shu tariqa, O‘zbekiston chim ustida xokkey bo‘yicha terma jamoasi Aichi-Nagoya 2026 Osiyo o‘yinlari ishtirokchisi sifatida tarixiy natijaga erishdi.
Eslatib o‘tamiz, Aichi-Nagoya 2026 Osiyo o‘yinlari musobaqalari joriy yilning 19-sentabr – 4-oktabr kunlari bo‘lib o‘tadi.
