Богдан Гусков чемпионлик йўлида Жамал Хиллга кўз тикди
Яримоғир вазн тоифаси рейтингининг 10-поғонасига кўтарилган аралаш яккакураш устаси Богдан Гусков навбатдаги рақиби ҳақида фикр билдирди. Унинг сўзларига кўра, энг мақбул вариант – собиқ UFC чемпиони ва рейтингда 6-ўринда турган Жамал Хилл.
– Бизда уч номзод бор: Волкан Оздемир, Ян Блахович ва Жамал Хилл. Улар орасида энг идеали – Хилл. У собиқ чемпион ва рейтинги мендан юқори. Блахович янада баландда, аммо Топ-5`да ва унга қарши жанг эҳтимоли камроқ. Хилл эса чемпионлик йўлида катта қадам бўлади. Аввали Топ-10, кейин Топ-5 рақиб билан жанг ва кейинги мақсад – чемпионлик! – деди Гусков.
Маълумот учун, Гусков UFCдаги сўнгги тўрт жангининг барчасини муддатидан аввал ғалаба билан якунлаган. Жамал Хилл эса июн ойида учинчи марта мағлубиятга учраб, Халил Раунтрига имкониятни бой берган.
