Баҳрайнда III Осиё ўйинлари бошланди
Кеча Ғарбий Осиёнинг Форс кўрфази қирғоқларида жойлашган Баҳрайн қироллиги мамлакатида III Осиё ёшлар ўйинларига старт берилди. Спортнинг 28 йўналиши бўйича қитъамизнинг энг кучли, иқтидорли ёшлари қарийб икки ҳафта мобайнида ғолиблик учун баҳс олиб боришади.
III Осиё ёшлар ўйинлари дастуридан ўрин олган футзал мусобақасида 8 та жамоа қатнашади. Улар қуръа натижасига кўра иккита гуруҳга ажратилган. Баҳрайн сафарига тайёргарлик кўраётган Ўзбекистон ўсмирлар терма жамоаси “А” гуруҳида мусобақа мезбони – Баҳрайн, шунингдек, Афғонистон ҳамда Хитой терма жамоаларига қарши майдонга чиқади. “Б” гуруҳидан эса Эрон, Таиланд, Саудия Арабистони ҳамда Қирғизистон терма жамоалари ўрин эгаллашган.
Осиё ўйинлари дастуридан ўрин олган футзал баҳслари Баҳрайн мамлакатининг шимолий қисмида жойлашган Иса Таун шаҳридаги 3600 томошабинга мўлжалланган “Халифа спорт сити” мажмуасида бўлиб ўтиши эълон қилинди. Терма жамоамиз Баҳрайнга 21-октябр кечаси учиб кетади ва дастлабки учрашувини 24-октябр куни Афғонистон ўсмирларига қарши ўтказади.
Эслатиб ўтамиз, Осиё ўйинлари футзал баҳслари 2026 йили Сенегал пойтахти Дакар шаҳрида бўлиб ўтадиган IV Ёзги Ёшлар Олимпиядаси учун саралаш мусобақаси вазифасини ўтаб беради.
