Bahraynda III Osiyo o‘yinlari boshlandi
Kechagi kuni G‘arbiy Osiyoning Fors ko‘rfazi sohillarida joylashgan Bahrayn qiroli mamlakatida III Osiyo yoshlar o‘yinlariga start berildi. Sportning 28 yo‘nalishi bo‘yicha qit’amizning eng kuchli, iqtidorli yoshlari qariyb ikki hafta davomida g‘oliblik uchun bahs olib borishadi.
III Osiyo yoshlar o‘yinlari dasturidan o‘rin olgan futzal musobaqasida 8 ta jamoa qatnashadi. Ular qur’a natijasiga ko‘ra ikkita guruhga ajratilgan. Bahrayn safariga tayyorgarlik ko‘rayotgan O‘zbekiston o‘smirlar terma jamoasi “A” guruhida musobaqa mezboni – Bahrayn, shuningdek, Afg‘oniston hamda Xitoy terma jamoalariga qarshi maydonga chiqadi. “B” guruhidan esa Eron, Tailand, Saudiya Arabistoni va Qirg‘iziston terma jamoalari o‘rin egallagan.
Osiyo o‘yinlari dasturidan o‘rin olgan futzal bahslari Bahrayn mamlakatining shimoliy qismida joylashgan Isa Taun shahridagi 3600 tomoshabinga mo‘ljallangan "Xalifa sport siti" majmuasida bo‘lib o‘tishi e’lon qilindi. Terma jamoamiz Bahraynga 21-oktabr kechasi uchib ketadi va dastlabki uchrashuvini 24-oktabr kuni Afg‘oniston o‘smirlariga qarshi o‘tkazadi.
Eslatib o‘tamiz, Osiyo o‘yinlari futzal bahslari 2026 yili Senegal poytaxti Dakar shahrida bo‘lib o‘tadigan IV yozgi yoshlar olimpiadasi uchun saralash musobaqasi vazifasini o‘tab beradi.
