Байдарка ва каноэда эшкак эшиш бўйича миллий терма жамоамиз жаҳон чемпионатида иштирок этади
Байдарка ва каноэда эшкак эшиш бўйича миллий терма жамоамиз жаҳон чемпионатида иштирок этади.
Жорий йилнинг 26–30-август кунлари Польшанинг Познан шаҳрида катталар ўртасида ICF байдарка ва каноэда эшкак эшиш (Canoe Sprint) ҳамда параканоэ бўйича жаҳон чемпионати бўлиб ўтади. Ушбу машҳур Malta Regatta Course эшкак эшиш канали халқаро миқёсдаги йирик турнирларга бир неча бор мезбонлик қилган. Айни шу маскан ўз бағрига барчани чорлайди.
Познан шаҳрида дунёнинг энг кучли спортчилари байдарка ва каноэнинг Олимпия ҳамда ноолимпия дастурига кирувчи йўналишларида жаҳон чемпионлиги учун баҳс олиб боришади. Мусобақада дунёнинг 100 дан ортиқ мамлакатида минглаб спортчиларнинг иштирок этиши кутилмоқда. Бу эса мазкур чемпионатни Халқаро каноэ федерацияси (ICF) тақвимидаги энг йирик ва нуфузли мусобақалардан бирига айлантиради.
Жорий жаҳон биринчилиги Лос-Анжелес–2028 Олимпия ўйинлари олдидан спортчилар учун муҳим халқаро синов вазифасини ҳам ўтайди. Унда қайд этиладиган натижалар халқаро рейтингни шакллантириш ҳамда Олимпия йўлланмаларини қўлга киритиш жараёнида муҳим аҳамият касб этади.
Ташкилотчилар мусобақада Германия, Венгрия, Испания, Польша, Украина, Хитой, Канада, Австралия, Ўзбекистон ҳамда дунёнинг бошқа етакчи терма жамоалари иштирок этишини кутмоқда. Шубҳасиз, ушбу жаҳон чемпионати мавсумнинг энг муҳим старти ҳисобланиб, байдарка ва каноэда эшкак эшиш бўйича дунёнинг энг кучли спортчилари ўртасидаги муросасиз баҳсларнинг сув майдонига айланади.
Демак, ушбу муҳим стартда иштирок этувчи мамлакатимиз спортчиларига биргаликда мухлислик қиламиз!
