Азизжон Камилов Халқаро дзюдо федерациясида икки муҳим лавозимни эгаллади
11 июн куни Венгрия пойтахти Будапешт шаҳрида Халқаро дзюдо федерацияси (IJF)нинг навбатдаги Конгресси бўлиб ўтди. Ўзбекистон спорт жамияти учун муҳим янгилик — мамлакатимиз дзюдо федерацияси раиси Азизжон Камилов мазкур Конгрессда IJF’нинг олий бошқарув органи — Ижроия қўмитаси аъзоси, шунингдек, IJF Таълим директори (Education Director) лавозимига сайланди.
Айни пайтда Осиё дзюдо иттифоқи вице-президенти сифатида ҳам фаолият юритиб келаётган Камилов энди халқаро миқёсда дзюдо соҳасида таълим ислоҳотлари — мураббийлар, ҳакамлар ва маъмурий мутахассислар тайёрлаш, кадрлар салоҳиятини ошириш борасидаги муҳим йўналишларга масъул бўлади.
Шунингдек, у Халқаро дзюдо федерацияси президенти Мариус Визер билан ҳамкорликда дзюдони олимпия спорт турлари қаторидаги мавқеини янада мустаҳкамлаш учун ҳаракат қилади.