Азизжон Камилов Бухоро Олимпия ва паралимпия спорт турларига тайёрлаш марказида бўлди
Ўзбекистон дзюдо федерацияси раиси, Осиё дзюдо иттифоқи (JUA) вице-президенти Азизжон Камилов Бухоро вилоятига сафари доирасида Олимпия ва паралимпия спорт турларига тайёрлаш маркази билан яқиндан танишди.
Вилоятларда мавжуд инфратузилмани янада яхшилашга асосий эътиборини қаратaётган федерация раҳбари спорт даргоҳида спортчи-ўқувчилар ва алоҳида дзюдочилар учун яратилган шароитлар билан танишди. Марказнинг дзюдо бўлимида таҳсил олаётган ёш дзюдочилар ҳамда уларнинг мураббийлари билан суҳбатлашди.
Сир эмас, бугунги кунда Бухоро ҳудудлар орасида дзюдоси ривожланган, маҳаллий ва халқаро мусобақалардаги натижалари айтилганга арзийдиган, барча ёш тоифаларида терма жамоаларга муносиб номзодларни етказиб бераётган вилоят ҳисобланади. Олимпия ва паралимпия спорт турларига тайёрлаш марказида шуғулланаётган болалар орасида ҳам ўзбек дзюдосининг эртанги авлоди борлигига ишонамиз.
