Azizjon Kamilov Buxoro Olimpiya va paralimpiya sport turlariga tayyorlash markazida bo‘ldi
O‘zbekiston dzyudo federatsiyasi raisi, Osiyo dzyudo ittifoqi (JUA) vitse-prezidenti Azizjon Kamilov Buxoro viloyatiga safari doirasida Olimpiya va paralimpiya sport turlariga tayyorlash markazi bilan yaqindan tanishdi.
Viloyatlarda mavjud infratuzilmani yanada yaxshilashga asosiy e’tiborini qaratayotgan federatsiya rahbari sport dargohida sportchi-o‘quvchilar va alohida dzyudochilar uchun yaratilgan sharoitlar bilan tanishdi. Markazning dzyudo bo‘limida tahsil olayotgan yosh dzyudochilar hamda ularning murabbiylari bilan suhbatlashdi.
Sir emas, bugungi kunda Buxoro hududlar orasida dzyudosi rivojlangan, mahalliy va xalqaro musobaqalardagi natijalari aytishga arzigulik, barcha yosh toifalarida terma jamoalarga munosib nomzodlarni yetkazib berayotgan viloyat hisoblanadi. Olimpiya va paralimpiya sport turlariga tayyorlash markazida shug‘ullanayotgan bolalar orasida ham o‘zbek dzyudosining ertangi avlodi borligi ishonamiz.
