Aston Martin 2026 йилги мавсум учун янги либосларни намойиш этди (фото)
Formula-1'нинг Британия вакили ҳисобланган Aston Martin жамоаси 2026 йилги пойгалар мавсуми учун мўлжалланган янги экипировкаларни расман тақдим этди.
Келаётган чемпионатда жамоа шарафини ўзгаришсиз қолган таркиб — икки карра жаҳон чемпиони, испаниялик фахрий пойгачи Фернандо Алонсо ҳамда канадалик Ленс Стролл ҳимоя қилади.
Ортда қолган 2025 йилги мавсум жамоа учун анча мураккаб кечди. Конструкторлар кубогида Aston Martin якуний жадвалнинг еттинчи поғонасидан жой олди. Шахсий кўрсаткичлар бўйича эса Фернандо Алонсо кучли ўнликни якунлаб берган бўлса, Ленс Стролл мавсумни 16-ўринда якунлади.
Эътиборли жиҳати шундаки, жамоанинг келажакдаги натижаларидан умид катта. Аввалроқ Aston Martin раҳбари лавозимига тайинланган афсонавий британик конструктор Адриан Ньюи жамоа олдига қўйилган стратегик вазифалар ҳақида тўхталиб ўтган эди. Мутахассиснинг тажрибаси ва янги техник регламент 2026 йилги мавсумда жамоани етакчилар сафига қайтариши кутилмоқда.
