Андижонда Ҳоким олимпадаси мусобақалари давом этмоқда
Андижон олимпия ва паралимпия спорт турларига тайёрлаш марказида бокс бўйича “Андижон шаҳар ҳокими олимпадаси” мусобақаси бўлиб ўтди. Тадбирнинг очилиш маросимида шаҳар ҳокими ўринбосари, Ўзбекистон Миллий Олимпия қўмитасининг Андижон вилояти ҳудудий бўлинмаси ижрочи директори ҳамда спорт мактаблари раҳбарлари иштирок этди.
Мусобақаларда 13–14 ёш тоифасидаги спортчилар 10 та вазн йўналишида беллашдилар. Унда спорт мактаблари, хусусий спорт клублари ва умумтаълим муассасалари қошидаги спорт тўгараклари вакиллари қатнашиб, ғолиблик учун муросасиз кураш олиб бордилар.
Якуний натижаларга кўра, ғолиб ва совриндорлар ташкилотчилар томонидан диплом ва медаллар билан тақдирланди. Ўз вазн тоифаларида энг юқори натижани қайд этган спортчилар мусобақанинг кейинги босқичига йўлланмани қўлга киритдилар.
