Айтжан Халмаханов Тошкентда бўлиб ўтадиган PWL-11 мусобақасида Олимпия чемпиони Луис Орта Санчесга қарши баҳс олиб боришга яқин турибди
Ўзбекистонлик таниқли курашчи Айтжан Халмаханов Тошкентда бўлиб ўтадиган PWL-11 мусобақасида Олимпия чемпиони Луис Орта Санчесга қарши баҳс олиб боришга яқин турибди.
Маълумотларга кўра, ушбу кураш бўйича томонлар ўртасида келишув деярли 80 фоизга етган. Ҳозирда фақатгина бир нечта ҳужжатлар имзоланиши қолган бўлиб, улар расман тасдиқланса, икки номдор спортчи Тошкент гиламида тўқнаш келади.
Таъкидлаш жоиз, Луис Орта Санчес — Токио-2020 Олимпия ўйинлари ғолиби ҳамда 2023 йил Жаҳон чемпиони, Куба терма жамоасининг етакчи аъзоларидан бири ҳисобланади. Айтжан Халмаханов эса ушбу тарихий баҳсни ўз юртида, мухлислар қаршисида ўтказиши кутилмоқда.
Бу ҳақда PWL ташкилоти аъзоларидан бири норасмий тарзда маълум қилди. Агар келишув якунга етказилса, PWL-11 турнири энг томошабоп ва муҳим курашлардан бирига саҳна бўлади.
