«Adidas» 2027 йилдан бошлаб Formula-1'да «Red Bull» билан ҳамкорлик қилади
Германиянинг «Adidas» спорт бренди «Red Bull» жамоаси билан келишувга эришди ва 2027 йилдан бошлаб Formula-1 жамоасининг техник ҳамкорига айланади.
Bild нашрининг хабар беришича, шартнома камида уч йилга мўлжалланган бўлиб, унинг қиймати ҳар бир мавсум учун тахминан 27 миллион еврони ташкил этади.
Аввалроқ «Adidas» «Мерседес» ва «Audi» жамоалари билан ҳам ҳамкорликни йўлга қўйган эди. Ўз навбатида, 2026 йилги мавсумда «Red Bull» жамоасини «Puma» бренди либослар билан таъминлайди.
Шунингдек, «Adidas»нинг асосий рақобатчиси бўлган «Puma» «Макларен» ва «Ferrari» жамоаларининг ҳамкори бўлиб қолади.
Bild нашрининг қайд этишича, adidas аллақачон «Red Bull» учун илк қўшма коллекция дизайнини тақдим этган. Унда жамоанинг анъанавий тўқ кўк ранги сақлаб қолинган бўлса-да, бренднинг рамзи ҳисобланган учта йўл (three stripes) кўринишидаги янги акцентлар пайдо бўлади.
Ҳозирча adidas компанияси ушбу келишув бўйича расмий изоҳ беришдан бош тортди.
