Ҳабиб Нурмагомедов – Inbazar.uz брендининг юзи
ММА жаҳон юлдузи ва собиқ UFC чемпиони Ҳабиб Нурмагомедов ўзбек спорт кийимлари бренди Inbazar.uz билан ҳамкорлик шартномасини имзолади. Компания бу ҳақда расмий равишда Instagram саҳифасида маълум қилди.
Шартнома доирасида Нурмагомедов олти ой давомида бренд реклама ишларида иштирок этади ҳамда ўзбек маҳсулотларини халқаро миқёсда тарғиб қилади.
Интернетда эълон қилинган фотосуратда Ҳабиб янги коллекциядаги спорт кийимида намоён бўлди. Компания маълумотида қайд этилишича, ушбу спорт кийими 30 кун ичида сотувга чиқарилади.
Ҳабиб Нурмагомедов — UFC тарихидаги энг таниқли жангчилардан бири. У ўз фаолиятини мағлубиятсиз, 29-0 натижа билан якунлади ва ташкилот тарихида енгил вазнда чемпионликка эришган биринчи россиялик спортчи сифатида ном қозонди. У ўзининг интизоми, харизмаси ва анъаналарга садоқати билан миллионлаб мухлисларнинг ҳурматига сазовор бўлган.
