Абдусатторов Saint Louis Rapid & Blitz’нинг иккинчи кунни муваффақиятли якунлади
АҚШнинг Миссури штатида жаҳоннинг етакчи гроссмейстерлари иштирокидаги Saint Louis Rapid & Blitz шахмат турнири давом этмоқда. 15 августга қадар ўтадиган мусобақа умумий жамғармаси 175 минг доллар бўлган GCT сериясининг тўртинчи босқичи ҳисобланади.
Турнир форматига кўра, дастлабки уч кун — рапид (25+10) йўналишида, кейинги икки кун эса блиц (5+2) баҳсларига бағишланади. Рапидда ғалаба 2 очко, блицда эса 1 очко билан баҳоланади.
Биринчи кун Нодирбек Абдусатторов учун омадли кечмаган бўлса-да (1 дуранг, 2 мағлубият), иккинчи кун ўтказилган уч турда у бир ғалаба ва икки дуранг қайд этди. 4-турда у АҚШ шахматчиси Григорий Опаринни енгди, 5-турда вьетнамлик Ле Куанг Льем билан, 6-турда эса ҳиндистонлик жаҳон чемпиони Гукеш Доммараджу билан дуранг ўйнади.
Бугун, 13 август куни рапид баҳсларининг сўнгги кунида Абдусатторов франциялик Максим Вашье-Лагрва, америкалик Сэм Шанкланд ва Леньер Домингесга қарши майдонга тушади. Ҳозирча у 5 очко билан 10 иштирокчи орасида 7-ўринда бормоқда.
