Абдусатторов рапид баҳсларини муваффақиятсиз якунлади
Хорватиянинг Загреб шаҳрида ўтаётган “Grand Chess Tour” туркумидаги SuperUnited Rapid & Blitz Croatia мусобақасининг рапид қисми якунланди. Ушбу нуфузли турнирда дунё шахматининг етакчи номлари — Гукеш Доммараджу, Магнус Карлсен, Фабиано Каруана ва бошқалар қаторида ҳамюртимиз Нодирбек Абдусатторов ҳам иштирок этди.
Тўққиз турлик рапид баҳслари якунига кўра, Гукеш Доммараджу 14 очко тўплаб чемпионликни қўлга киритди. Ян-Криштофф Дуда (Польша) 11 очко билан иккинчи, Магнус Карлсен (Норвегия) эса 10 очко билан учинчи ўринни эгаллади.
Абдусатторов эса рапид йўналишини муваффақиятсиз якунлади — у 9 партияда 6 очко жамғарди (2 ғалаба, 4 дуранг, 3 мағлубият) ва 10 нафар иштирокчи орасида охирги ўринни эгаллади.
Шу куни у Ян-Криштофф Дуда, Магнус Карлсен ва Алиреза Фирузджага қарши учта дуранг қайд этди.
Эслатиб ўтамиз, рапид баҳсларида ғалаба учун 2 очко, дуранг учун 1 очко берилади.
Эртанги кундан бошлаб мусобақа блиц (тезкор шахмат) тури билан давом этади. Унда 18 турдан иборат жадал баҳслар ўтказилади.
